Фондот за здравствено осигурување (ФЗО) во соработка со Министерството за дигитална трансформација воведе четири нови електронски услуги достапни преку порталот uslugi.gov.mk. На денешната прес-конференција, министерот Стефан Андоновски и директорот на ФЗО, Сашо Клековски, појаснија дека целта е целосна елиминација на административниот товар за граѓаните и фирмите.
За граѓаните (физички лица) веќе се достапни следните е-услуги:
- Потврда за пријави и одјави во задолжително здравствено осигурување;
- Потврда за статус на осигурено/неосигурено лице и платен придонес;
- Потврда за исплатен надоместок за боледување (привремена спреченост за работа).
За правните лица, пак, за првпат е овозможено електронско издавање на потврда за платен придонес за здравствено осигурување, која е достапна дигитално во секое време. Дополнително, ФЗО сега е технички поврзан со Централниот регистар на население, што овозможува автоматско преземање на податоците без граѓаните да мораат да доставуваат дополнителни документи.