На Универзитетската клиника за детски болести во моментов се хоспитализирани околу 20 деца со симптоми на акутни вирусни инфекции. Кај најголемиот дел од пациенти е изолиран вирусот Инфлуенца А, додека кај помалите деца на возраст до 23 месеци регистриран е респираторен синцицијален вирус (РСВ), како и помал број случаи на ентеровирус и риновирус.
Пациентите се на возраст до 14 години, но најголемиот дел од хоспитализираните се деца до петгодишна возраст. Нивната општа состојба е добра и во моментот нема потешки случаи кои бараат кислородна поддршка. Дел од децата развиле компликации како бронхит, бронхопневмонија или бронхиолит. Лекарите апелираат на изолација на болните деца и првичен третман во домашни услови доколку нема влошување на симптомите.