Пратеникот на ВМРО-ДПМНЕ, Бране Петрушевски, денеска изјави дека јавните сведоштва на д-р Жан Митрев го разоткриле „мафијашкиот модел на дејствување“ на претходната власт предводена од Зоран Заев и Венко Филипче.
Според Петрушевски, во екот на пандемијата и вонредната состојба, наместо грижа за јавното здравје, тогашниот премиер и министерот за здравство ја злоупотребиле моќта за обид за непријателско преземање на приватната болница.
„Според јавно изнесените сведоштва, Заев и Филипче сакале сами да ја одредат вредноста на болницата. За возврат нуделе ’помош‘ во судска постапка на докторот Жан Митрев. Ова е класична уцена и класична злоупотреба на власта“, истакна Петрушевски.
Пратеникот додаде дека овие обвинувања се надоврзуваат на низата афери за имоти во Дубаи и сомнителни трансакции. Тој го повика Јавното обвинителство веднаш да постапи и да ги истражи сите наводи, порачувајќи дека Филипче, како наследник на политиките на Заев, нема морален кредибилитет да води политичка партија.