Околу 100 верници од Прилеп ќе учествуваат на централното, традиционално фрлање на Светиот крст во осветените води на Аква базенот во прилепскиот хотел „Салида“, кое ќе се одржи в понеделник напладне, на Богојавление – Водици. Од пријавените учесници, едно е женско.
Вкупно над 500 верници ќе се вклучат на 20 локации на територијата на Општина Прилеп за овој верски обред. Покрај централниот настан, Светиот крст ќе биде положен во водите на реките и базените во 19 други населени места: Селце, Витолиште, Бешиште, Полчиште, Ново Лагово, Загорани, Кадино Село, Мало Коњари, Големо Коњари, Беровци, Клепач, Ерековци, Галичани, Чепигово, Подмол, Алинци, Тополчани, Плетвар и Штавица.
Утрото на Водици, во прилепската црква „Св. Благовештение“, ќе се одржи традиционалното пуштање на гулабите во 6:30 часот и свечената божествена литургија. Околу 9:30 часот симболично ќе се изврши и фрлањето на Светиот крст во фонтаната во дворот на црквата, наменето за дечиња до 13 години, кои ќе имаат можност да го извлечат Светиот крст од осветените води.
Градоначалникот на Прилеп, Дејан Проданоски, претседателката на Советот и делегации составени од членовите на Советот ќе присуствуваат на сите 20 локации.
– „Локалната самоуправа обезбеди пригодни подароци за сите учесници, а компаниите „Зегин“ и „Евротип“ ќе обезбедат и награди за оние што први ќе го извадат Светиот крст од осветените води во Прилеп“, информираат од општината.