Во Клубот на пратениците денеска, на иницијатива на премиерот и претседател на ВМРО-ДПМНЕ, Христијан Мицкоски, ќе се одржи лидерска средба на парламентарните партии. На дневен ред се клучни реформски закони, изборот на народен правобранител, Изборниот законик и укинувањето на Пржинската влада.
Учество на средбата потврдија лидерите на ДУИ, Али Ахмети, на Левица, Димитар Апасиев, како и претставници на коалицијата Вреди и движењето ЗНАМ. Претседателот на СДСМ, Венко Филипче, единствен го одби повикот, со став дека техничката влада мора да остане како гарант за фер избори.
„Ние ја прифативме поканата и одлучивме да одиме на лидерската средба. Во поканата нема конкретни прашања“, изјави координаторот на Вреди, Беким Ќоку, додавајќи дека на земја што преговара за ЕУ не ѝ прилега техничка влада.
Премиерот Мицкоски изрази жалење за одлуката на СДСМ, нагласувајќи дека сакал инклузивен процес. „Тема на лидерската средба е само Законот за Владата. Ако ние се однесуваме неодговорно, како што се однесува тој, нам не ни е потребна лидерска средба, ние со 61 глас може да ја избришеме техничката влада“, рече Мицкоски.
Левица ќе присуствува, но со услов укинувањето на техничката влада да оди во пакет со една изборна единица. „Сметаме дека сега е времето да влеземе во конструктивен дијалог“, изјави пратеникот Амар Мециновиќ.