Три грчки танкери за нафта беа погодени од неидентификувани дронови во Црното Море во вторник, додека беа на пат да натоварат сурова нафта на рускиот терминал „Јужнаја Озерејевка“, соопштија извори за Ројтерс. Нападите доаѓаат во време кога производството на нафта во Казахстан, од кое поголемиот дел се извезува преку овој терминал, драстично опадна на почетокот на јануари. Засега не е јасно кој стои зад нападот.
Украина не дала коментар за инцидентот, а Конзорциумот за Касписки гасовод (CPC), кој управува со терминалот, одби да изјави нешто за нападот.
Според анонимни извори, два танкери „Суецмакс“ и еден „Афрамакс“ беа погодени на пат кон терминалот, кој обработува околу 80% од казахстанската нафта наменета за меѓународните пазари. На 29 ноември минатата година, украински дрон го погоди еден од трите главни пристаништа на CPC во близина на Новоросијск.
Производството на нафта и кондензат во Казахстан се намали за 35% помеѓу 1 и 12 јануари споредено со просекот во декември, главно поради ограничувањата за извоз преку Црното Море, додаде изворот. Министерството за енергетика на Казахстан соопшти дека CPC продолжува да извезува нафта преку едно пристаниште.
Нападите врз танкерите би можеле да ја зголемат цената на транспортот и осигурувањето за оние кои сакаат да натоварат нафта на руските терминали на Црното Море, кои обработуваат повеќе од 2% од глобалната сурова нафта.
Еден од погодените танкери, „Делта Хармони“, го управува грчката компанија „Делта Танкерс“ и требало да товари нафта од „Тенгизчевроил“, единица на „Шеврон“. Друг танкер, „Делта Суприм“, исто така управуван од „Делта Танкерс“, бил погоден. Третиот брод, „Матилда“, изнајмен од подружница на казахстанската државна компанија „КазМунајГас“ и управуван од грчката „Тенамарис“, бил погоден од два дрона додека чекал на 48 км од пристаништето.
– „Нема повредени, а штетата е минимална и поправлива. Бродот е пловен и ја напушта областа“, изјави службеник од „Тенамарис“. Извори наведуваат дека на „Матилда“ на кратко избувнал пожар, кој бил брзо изгаснат.
Првично се мислеше дека бил погоден и четвртиот танкер „Фројд“, но компанијата ТМС подоцна го негираше тоа. Акционери на 1.500 км долгата траса на CPC се „КазМунајГас“, единиците на „Шеврон“, како и руските „Лукоил“ и „ЕксонМобил“.