58-годишна скијачка го загуби животот по силна лавина на планината Гилферт во австриски Тирол. Несреќата се случила во неделата попладне на надморска височина од околу 2.300 метри, додека жената се спуштала по северозападниот дел на планината.
Според спасувачките служби, лавината била со широчина од 100 метри и должина од 40 метри. Иако опасноста од лавини била оценета со второ ниво (умерена), снежната плоча целосно ја затрупала скијачката. Потрагата траела речиси два часа бидејќи жената со себе не носела примопредавател за лавина (LVS уред), што е стандарден дел од опремата за движење надвор од патеките.
По еден час и 45 минути, таа била пронајдена и итно пренесена во болница, каде подоцна им подлегнала на повредите. Нејзиниот 32-годишен придружник, кој не бил зафатен од снегот, успеал веднаш да повика помош.