Денеска во општините Гостивар, Маврово-Ростуше, Врапчиште и Центар Жупа се одржуваат повторни избори за градоначалник, откако во првиот круг од локалните избори, одржани на 19 октомври минатата година, не беше обезбедена законски потребната излезност од најмалку 33,33 проценти од регистрираните гласачи.
Според Изборниот законик, за изборите да бидат успешни на повтореното гласање, потребно е повеќе од половина од граѓаните кои ќе излезат на гласање да го дадат својот глас за еден од кандидатите.
Гласањето започна во 7:00 часот, а избирачките места ќе бидат отворени до 19:00 часот. Граѓаните се идентификуваат со важечки лични документи – лична карта или пасош, а проверката на идентитетот се врши и преку биометриски уреди.
Во општина Гостивар гласањето се одвива на 120 избирачки места. Во Избирачкиот список се запишани вкупно 82.870 гласачи, од кои 78.185 се постојани жители на општината, а 4.604 се запишани на посебниот Избирачки список за гласачи кои живеат во странство.
Во Маврово-Ростуше има 40 избирачки места, а право на глас имаат 10.575 граѓани. Од нив, 9.622 се жители на општината, додека 951 гласач е запишан на списокот за дијаспората.
Во Врапчиште гласањето се одвива на 39 избирачки места, а во Избирачкиот список се запишани 27.279 гласачи. Од нив, 26.318 се постојани жители, а 950 гласачи се евидентирани како жители во странство.
Во Центар Жупа гласањето се одржува на 16 избирачки места. Во Избирачкиот список се запишани 7.562 гласачи, од кои 6.305 се во општината, а 1.257 лица се запишани на посебниот список за гласачи од странство.
Вчера, во овие четири општини, правото на глас го остварија болни и немоќни лица, како и лица кои се на издржување казна затвор.