Поранешниот претседател на Руската Федерација, Дмитриј Медведев, реагираше на најновите глобални случувања, осврнувајќи се на рускиот напад врз Украина, апсењето на венецуелскиот претседател Николас Мадуро и на потезите на Соединетите Американски Држави, оценувајќи дека годината започнала „турбулентно“.
Говорејќи за апсењето на Мадуро, Медведев наведе дека постојат само две можни сценарија.
„Денес постојат само две сценарија: или САД тивко ќе го ослободат киднапираниот венецуелски претседател под убедлив изговор (мала веројатност), или тој ќе стане новиот латиноамерикански Мандела (најверојатно). Тогаш неговото име ќе биде запишано во аналите на јужноамериканската историја заедно со Боливар, Миранда и Чавез. Дури и ако Мадура, од тврдоглавост, Трамп не помилува по некое време, Венс или друг наследник сигурно ќе го сторат тоа под притисок на јавноста“, изјави Медведев.
Тој оцени дека нафтата е клучен фактор во целиот случај, но дека дури и тоа нема да биде доволно за лесно решение.
„Што ако сегашните венецуелски власти не се подготвени да го споделат тоа со Американците на долг рок? Дали Трамп навистина ќе започне копнена операција? Конгресот дефинитивно ќе биде потребен тука – и тоа ќе биде многу покрваво од дрското киднапирање на Мадуро. А Сенатот штотуку стави јамка околу Трамп, ја ограничи неговата милитаристичка ревност. И дали ова навистина е потребно за сегашната администрација? Сомнително“, смета тој.
Осврнувајќи се на најавените американски санкции кон Русија, Медведев оцени дека тие се неизбежни, без разлика на изјавите на претседателот Доналд Трамп.
„Санкции против Русија најави Трамп, кои тој ‘се надева дека нема да ги употреби’. Тука сè е јасно и нема илузии. Политиката на американски санкции ќе продолжи, без разлика што ќе се случи. Русија ќе биде притисната да прави компромиси во врска со безбедносните гаранции и териториите што се целосно неприфатливи за нас“, наведе Медведев, нарекувајќи го сенаторот Линдзи Греам „стар, дегенериран русофоб“.
Поранешниот руски претседател се осврна и на неодамнешната заплена на танкер од страна на американската морнарица.
„Очигледно е зошто се најде под руското ‘привремено знаме’: под закана од апсење, тој побара заштита од нелегални санкции на САД. Сепак, избраниот метод не беше целосно соодветен“, изјави Медведев, оценувајќи дека станува збор за кршење на Конвенцијата на ОН за морското право, иако САД не ја ратификувале.
Тој нагласи дека тоа не го менува фактот оти, според него, станува збор за „криминално запленување на цивилен брод“.
„Мора да имаме предвид дека сегашните меѓународни односи се потонаа во апсолутен хаос од почетокот на годината. И мора да дејствуваме соодветно: има премногу непослушни луѓе наоколу“, заклучи Медведев во своето обраќање.