Претседателот на Советот на Град Скопје, Даме Димитровски, на денешната вонредна седница најави итна акција за заштита на најмладите. Тој информираше дека Советот веќе набавил прочистувачи за воздух кои ќе бидат дистрибуирани во текот на овој месец.
„Овој Совет изгласа да се купат прочистувачи за воздух за 400 училници во средните училишта во Скопје. Тие се набавени и ќе бидат дистрибуирани во текот на овој месец. Првата битка е итно да обезбедиме чист воздух во просториите каде престојуваат ранливите групи“, истакна Димитровски.
Според него, за подобар квалитет на воздухот во градинките, училиштата и болниците, неопходно е итно обезбедување соодветна вентилација и филтрација преку постојните системи за греење и климатизација. Димитровски нагласи дека паралелно со овие итни мерки, мора да се постават основи за „војна“ со загадувањето преку замена на печките на дрва со централно греење во домаќинствата.