Украинскиот претседател Володимир Зеленски ја обвини Русија дека се обидува да ги саботира мировните преговори и дека подготвува нови напади врз Украина, откако Кремљ соопшти дека спречил украински напад со дронови врз резиденцијата на рускиот претседател Владимир Путин кај Нижни Новгород.
Зеленски ги отфрли тврдењата како „типични руски лаги“ по двочасовниот состанок со американскиот претседател Доналд Трамп во Флорида. Тој оцени дека Москва користи „опасни изјави“ за да ги поткопа дипломатските напори со САД.
„Оваа наводна приказна за ‘удар во резиденцијата’ е целосна измислица наменета да оправда дополнителни напади врз Украина, вклучително и Киев, како и сопственото одбивање на Русија да преземе неопходни чекори за прекин на војната“, изјави Зеленски.
Украинскиот претседател предупреди дека е можен напад врз главниот владин комплекс во Киев, сличен на руското бомбардирање на зградата на министрите во септември.
Претходно, рускиот министер за надворешни работи Сергеј Лавров тврдеше дека Украина се обидела да ја погоди резиденцијата на Путин во регионот Новгород со 91 беспилотно летало. „Ваквите неодговорни акции нема да останат без одговор“, рече Лавров, додавајќи дека целите за одмазднички напади веќе се избрани.
Зеленски ги отфрли овие обвинувања, додека украинскиот министер за надворешни работи Андриј Сибиха изјави дека Москва применува стара тактика – „да ја обвинува другата страна за она што самата го прави или го планира“.
Во меѓувреме, американскиот претседател Доналд Трамп изјави дека веста за наводниот напад го направила „многу лут“. „Ова е деликатен период. Напад врз неговата куќа не е вистинско време за ништо од тоа“, рече Трамп, додавајќи дека сè уште нема докази.
Зеленски повтори дека Украина добила американска понуда за „силни“ безбедносни гаранции во траење од 15 години, но побара тие да бидат подолгорочни.
„Му реков [на Трамп] дека би сакале да разгледаме гаранции за 30, 40 или дури 50 години, и тоа би била историска одлука“, изјави Зеленски.