Францускиот претседател Емануел Макрон официјално потврди дека Франција ќе го замени актуелниот носач на авиони „Шарл де Гол“ со новиот PA-NG (Porte-Avions Nouvelle Génération), кој ќе биде најголемиот воен брод изграден во Европа досега.
Новиот носач ќе биде долг 310 метри, со депласман од 78.000 тони и екипаж од околу 2.000 лица. PA-NG ќе вклучува најсовремени технолошки решенија, како електромагнетен систем за полетување и слетување на авиони (EMALS), два нуклеарни реактори од типот K22 и напредни системи за управување со леталата, што ќе овозможат истовремени операции на палубата.
Макрон истакна дека овој проект претставува симбол на француската воена моќ, индустриски капацитети и технолошка супериорност, како и на стратешката улога на Франција на отворено море. Во изградбата ќе бидат вклучени над 800 компании и добавувачи, а стапувањето во оперативна употреба е планирано за 2038 година. Новиот носач ќе може да носи околу 30 летала, меѓу кои борбени авиони „Рафал“, беспилотни системи и потенцијално идниот европски ловец FCAS.