Собранието денеска, во рамки на 75-тата седница, ги избра Мухамет Хоџа за нов министер за животна средина и просторно планирање и Беким Сали за министер за европски прашања. Новите членови на извршната власт веднаш дадоа свечени изјави пред пратениците, со што и официјално го почнаа својот мандат.
Премиерот Христијан Мицкоски од собраниската говорница истакна дека со овие предлози се обезбедува целосна функционалност и континуитет на клучните ресори. За Хоџа, премиерот нагласи дека неговото долгогодишно искуство во администрацијата е гаранција за стабилност, додека за Сали посочи дека неговото претходно министерско искуство и мандатот во законодавниот дом ќе придонесат за подобра координација во евроинтеграциите.
Овие промени доаѓаат по локалните избори, откако досегашниот вицепремиер и министер Изет Меџити замина на градоначалничката функција во Чаир.