Спасувачките екипи вечерва стигнаа до остатоците од приватниот авион кој попладнево исчезна од радарите јужно од Анкара. Како што пренесуваат турските медиуми, авионот „Falcon 50“ се урнал на рид во близина на селото Кесикавак, во областа Хајмана, при што сите пет патници во леталото го загубиле животот.
Меѓу загинатите е и началникот на Генералштабот на либиската армија, Мухамед Али Ахмед Ал-Хадад, кој престојуваше во официјална посета на Турција. Смртта на петтемина патници ја потврди и либискиот премиер Абдулхамид Алдабаиба, опишувајќи го овој настан како „огромен губиток за нацијата“.
„Стигнавме до остатоците. Точната локација каде што се урна авионот е на рид 2 км јужно од селото Кесикавак во Хајмана. Се тврди дека имало експлозија на гориво кога се урна авионот, по што избил и пожар“, пренесува дописникот на CNN Türk.
Во авионот, покрај Ал-Хадад, биле и високи претставници на либиските копнени сили и военото производство. Причините за несреќата сè уште не се познати, а летовите на аеродромот „Есенбога“, кои беа привремено прекинати, сега се обновени.