Голема еколошка акција за разубавување и раззеленување се одржа денеска на територијата на Општина Кисела Вода, при што беа засадени околу 500 садници од зимзелени и други видови дрвја.
Акциите се одвиваа симултано на повеќе локации, вклучувајќи го паркот „Иднина“, дворовите на сите основни училишта, како и површини во 13 урбани и месни заедници.
Во садењето директно учествуваа градоначалничката Бети Стаменкоска Трајкоска, генералниот извршен директор на „ТИТАН Усје“, Костас Николау, како и голем број вработени од општинската администрација, компанијата и граѓани кои се приклучија на иницијативата.
Градоначалничката Бети Стаменкоска Трајкоска истакна дека оваа акција е дел од долгорочната стратегија за рамномерен развој на зелените површини и се заблагодари на директорот Костас Николау за покажаната општествена одговорност.
„Пошумувањето не е само симболичен чин, туку јасна и долгорочна определба на Општина Кисела Вода. Со секое засадено дрвце вложуваме во поквалитетен јавен простор и подобри услови за живот за сегашните и идните генерации“, изјави Стаменкоска Трајкоска.
Таа нагласи дека соработката со бизнис секторот е клучен сегмент во развојот на општината.