Расправата за разрешување на државниот обвинител Љупчо Коцевски нема да се одржи, бидејќи тој самиот се повлече од функцијата. Претседателот на Собранието, Африм Гаши, го извести законодавниот дом дека Коцевски поднел барање за престанок на функцијата, со што точката беше симната од дневниот ред.
Владата претходно достави предлог за негово разрешување, обвинувајќи го Коцевски за сериозни пропусти: оддавање службени тајни, лошо менаџирање со Обвинителството и непостапување согласно Уставот.
Коцевски поднесе неотповиклива оставка, само неколку часа пред Собранието да расправа за неговото разрешување. Тој во изјава за медиумите оцени дека предлогот за негова смена е чисто политичка одлука и се пожали на процедурата.
„Заминувам со гордо крената глава, но и со разочараност поради очигледното непочитување на принципите врз кои почива правната држава“, изјави Коцевски. Тој откри дека поканата за седницата ја добил дури утринава во 10 часот, само еден час пред почетокот, без воопшто да му биде доставен предлогот за разрешување.
Седницата започна со проблеми и одложување до 12:30 часот. Пратеничката Рина Ајдари од Алијанса за Албанците побара превод на материјалите, а Борислав Крмов од Левица реагираше на задоцнетото доставување на законите. Гаши одговори дека преводите се достапни во системот е-парламент.