Делегација од Северна Македонија, предводена од министерката за енергетика, рударство и минерални ресурси, Сања Божиновска, престојуваше во Белград на работна средба со српската колешка Дубравка Хандановиќ Ѓуровиќ.
Главен фокус на средбата беше забрзаната имплементација на проектот за гасен интерконектор меѓу Северна Македонија и Србија, кој е од стратешко значење за регионалната енергетска безбедност и диверзификација.
Изградбата на интерконекторот се очекува да биде завршена во 2027 година, а првиот гас да помине низ гасоводот во 2028 година.
Интерконекторот е долг околу 67 километри (23 км во С. Македонија и 44 км во Србија) и ќе ги поврзе гасните системи од Клечовце (С. Македонија) со Врање (Србија).
Покрај другите комерцијални банки, за финансирање на проектот е заинтересирана и Светската банка.
Се планира гасоводот да биде технички подготвен и за иден транспорт на водород, во согласност со европските зелени политики.
Министерката Божиновска нагласи дека проектот напредува според утврдената динамика:
„Интерконекторот со Србија е клучен проект што ќе ја отвори нашата земја кон нови извори на гас и ќе ја зајакне регионалната енергетска стабилност… Тој е едно од најважните инфраструктурни врски за целиот регион.“
Српската министерка Хандановиќ Ѓуровиќ ја потврди посветеноста на заедничката визија:
„Гасовниот интерконектор со Северна Македонија е проект кој има значење надвор од нашите граници… Ќе создадеме нова енергетска оска на стабилност меѓу двете земји.“
Двете делегации се обврзаа на интензивна координација за навремено исполнување на сите обврски, со цел интерконекторот да стане безбедна, функционална и модерна енергетска врска.