Македонија засега не планира да воведе радикални забрани за користење на социјалните мрежи за деца, како што предвидува австралискиот модел со ограничување под 16 години, изјави министерот за дигитална трансформација Стефан Андоновски.
Одговарајќи на прашањето дали Македонија ќе го следи примерот на Австралија, Андоновски нагласи дека секоја забрана мора внимателно да се донесе и имплементира.
„Секоја забрана треба да бидете свесни како ќе ја донесете, ќе има два ефекти. Ако не успеете да ја имплементирате до крај, таа ќе придонесе некои да се снаоѓаат, а некои да излезат целосно од контрола. Второ, елементот дали општеството е подготвено за таков радикален чекор“, истакна министерот.
Според Андоновски, клучното решение за заштита на децата лежи во едукацијата и работата со родителите.
„Решението е во едукација и работа со родителите, да ја насочат употребата на мобилните телефони кај децата кон работи кои се корисни, а не кон натпревари или содржини што одземаат премногу време без никаква корист“, рече тој.
Тој потсети дека сите социјални медиуми веќе имаат граница за корисници под 16 години.
„Ако родителите го имплементираат тоа кај своите деца, тогаш децата нема да имаат пристап до алгоритми и содржини кои се штетни за нив. Ако тоа не го прават родителите, многу е потешко државата да се меша во слободниот избор на секој граѓанин и семејство и да одлучува што смеат, а што не смеат“, појасни министерот.
Во однос на австралискиот закон, министерот изрази скептицизам дека проектот ќе успее целосно, бидејќи првите најави веќе покажуваат дека се наоѓаат начини за техничко заобиколување на забраните. Тој додаде дека Македонија веќе работи на заштита на децата преку Центарот за побезбеден интернет.