Триесет и осум нови случаи на лица со ХИВ/СИДА се регистрирани во Македонија од почетокот на годинава до 27 ноември, што претставува пад од 25,5 отсто во споредба со истиот период лани кога имало 51 случај.
Според најновиот извештај на Институтот за јавно здравје (ИЈЗ), објавен по повод Светскиот ден за борба против СИДА, оваа година се евидентирани осум смртни случаи поврзани со болеста.
Во однос на демографската слика, вирусот и понатаму доминантно ја погодува машката популација. Од 38-те нови случаи, дури 37 се мажи, а само едно лице е од женски пол. Просечната возраст е 35 години, при што најголем дел од заразените (над 73 отсто) се млади луѓе на возраст од 20 до 39 години.
Анализата на ризикот покажува дека кај 29 лица преносот настанал во рамките на МСМ популацијата (мажи кои имаат секс со мажи), додека кај пет лица е регистрирана хетеросексуална трансмисија.
ИЈЗ нотира дека Македонија останува земја со ниска преваленца, но предупредува на нагорен тренд на подолг рок, бидејќи 32 отсто од вкупно 726 регистрирани случаи од 1987 година досега, се откриени токму во последните пет години.
„Слично како и во останати земји од европскиот регион, во Македонија, мажи кои имаат секс со мажи се изложени на поголем ризик од ХИВ инфекција, во последните 10 години 72,8 отсто од регистрираните случаи се кај мажи кои имале секс со мажи“, наведуваат од ИЈЗ.