Поранешната германска канцеларка Ангела Меркел изрази надеж дека војната во Украина нема да заврши со победа на рускиот претседател Владимир Путин и повтори дека нејзината политика кон Москва била исправна. Во интервју за германскиот канал „Фокус“, Меркел нагласи дека денешните лидери мора да се соочат со реалноста на „нападот и агресијата врз Украина“, додавајќи дека клучната цел е „да Русија не победува, туку да постои суверена и слободна Украина која може сама да донесува одлуки“.
Меркел истакна дека со години била свесна за „сериозна опасност“ што ја гледала во политиката на Владимир Путин, наведувајќи дека уште во 2008 година добила впечаток дека рускиот претседател „со одредена доза на агресија и голема упорност се обидува да ја прошири својата сфера на влијание“.
Таа потсети дека договорите од Минск по 2014 година „купија време“ за Украина да го зајакне својот одбранбен капацитет. „Оваа војна избувна, го промени нашиот свет… Никој не можеше да ја спречи… Не успеавме, но обидите не беа погрешни“, рече Меркел.
Поранешната канцеларка оцени дека денес е неопходно зголемување на воените трошоци, паралелно со поинтензивна дипломатија. Таа се наврати и на самитот на НАТО во Букурешт во 2008 година, кога според неа започнала ескалацијата, објаснувајќи дека била загрижена за можните реакции на Москва доколку Украина и Грузија добиеја Акциски план за членство.
Меркел исто така повтори дека верува дека постоеле добри причини за изградба на „Северен тек 2“, од економски до политички мотиви. Потсети дека во 2021 година заедно со Џо Бајден се договориле дека доколку гасоводот се користи за уцена, „политички ќе го спречат тоа“, подвлекувајќи дека проектот никогаш не бил ставен во употреба.
Ангела Меркел беше на чело на германската влада 16 години, од 2005 до 2021 година, како прва жена канцеларка во историјата на земјата.