Под силно полициско обезбедување и во присуство на роднини на обвинетите дојдени од Турција, денеска во големата судница на Апелациониот суд во Штип започна судскиот процес за убиството на турскиот државјанин.
Обвинителството тврди дека се работи за дрско и организирано убиство извршено на 8 мај 2025 година на градскиот плоштад, додека одбраната инсистира делото да се преквалификува во „убиство на миг“.
Според обвинителката Билјана Тошева Анакиева, првоосомничениот извршител бил со непријавен престој и поседувал оружје без дозвола, а во Турција веќе бил осудуван за убиство. Второ и третоосомничените, исто така со криминално досие во матичната земја, во Македонија се претставувале со лажен идентитет.
Наспроти ова, адвокатот Шенаи Османов тврди дека обвинението е неосновано.
„Денеска имавме прилика да видиме добро составено обвинение од страна на ОЈО Штип, но за жал истото не е вистинито. Ние како одбрана увидовме низа на пропусти во обвинението и сметаме дека ОЈО Штип со ваквото обвинение не докажува разумно сомневање. Како одбрана ќе ја докажеме вистината дека ниту убиството е сторено со умисла, а ниту, пак, соизвршителите се помагачи во ова кривично дело“, изјави Османов.