Жители на Појасот Газа кои неодамна биле префрлени во Јужна Африка тврдат дека морале да платат по 2.000 долари за да ги извлечат своите семејства од разурнатата палестинска територија.
Двајца Палестинци за британските медиуми потврдиле дека биле дел од групата од 130 лица, на кои минатата недела им бил дозволен влез во Јужна Африка. Тие биле евакуирани со автобуси од Газа, а потоа пристигнале во Јоханесбург со авион по меѓуслетување во Најроби.
Според нивните сведоштва, одговориле на онлајн оглас на организацијата Ал-Маџд Европа, во кој се нудела можност за напуштање на Газа – оглас кој, како што велат, бил наменет исклучиво за семејства.
Реакција од Јужна Африка
Министерот за надворешни работи на Јужна Африка, Роналд Ламола, изјави дека властите испитуваат „сомнителни околности околу пристигнувањето на авионот што ги превезува Палестинците во Јоханесбург“.
„Се чини дека станува збор за поширок план за протерување на Палестинците од Палестина“, рече Ламола на прес-конференција.
Јужна Африка долго време ги поддржува палестинските државни аспирации и го обвинува Израел за геноцид во Газа.
Одговор од Израел
Израел ги отфрли обвинувањата за геноцид како политички мотивирани, истакнувајќи дека воените операции се насочени против Хамас, а не против цивилите.
Портпаролот на израелската влада, одговарајќи на коментарите на Ламола, порача дека премиерот Бенјамин Нетанјаху јасно ставил до знаење оти Палестинците треба да можат да го напуштат Појасот Газа ако сакаат – но и дека треба да им биде дозволено да се вратат ако тоа го побараат.
Извештаи за плаќање и сомнежи околу организациите
„Ал Џезира“ пренесе дека многу Палестинци навистина плаќаат 2.000 долари за да ја напуштат Газа, често без да знаат каде ќе бидат однесени. Според медиумот, луѓето се принудени да заминат поради „неподносливата ситуација“ – две години континуирано бомбардирање, уништени домови и загуба на сè што поседуваат.
Организацијата Ал-Маџд Европа, која ја нуди оваа можност, оставила „многу отворени прашања“, пишува Ал Џезира. Медиумот додава дека постои координација со израелските власти за транспортот на Палестинците, кои прво се пренесуваат со автобуси преку таканаречената „жолта линија“, а потоа се упатуваат кон меѓународен аеродром.