Безживотно тело на младо женско лице е пронајдено синоќа во Тетово, во близина на Зелениот пазар, помеѓу зградите спроти Центарот за социјални работи.
Јавното обвинителство денеска соопшти првична информација дека смртта не е резултат на кривично дело.
Дежурен јавен обвинител од Основното јавно обвинителство Тетово веднаш извршил увид на местото каде е најдена девојката, како и во изнајмениот стан во кој таа престојувала.
„Се преземаат сите дејствија за испитување на причините за смртта со детални проверки и вештачења на местото, иако првичните сознанија и траги на лице место не упатуваат дека смртта е резултат на кривично дело“, соопшти Обвинителството.
Сепак, наредена е обдукција, а обвинителството и истражните органи интензивно постапуваат, вклучително и распит на повеќе лица, со цел целосно утврдување на причините.
Според неофицијални информации кои кружат на социјалните мрежи, станува збор за 24-годишна девојка од Косово која студирала во Тетово.