Директорка на средно училиште која во електронска комуникациска група споделила содржина од политичка партија и изборен плакат, со молба за поддршка на кандидат, ќе биде процесуирана од Јавното обвинителство.
Државната комисија за спречување на корупцијата (ДКСК) на денешната седница информираше дека, постапувајќи по пријавата, утврдила оти надлежен орган за понатамошно постапување е токму Јавното обвинителство.
Антикорупциска на истата седница затворила неколку други пријави поврзани со изборите, бидејќи не утврдила прекршувања.
Меѓу нив е и пријавата за избор на професор за проректор на универзитет, каде е утврдено дека лицето веќе имало работен однос, што не се смета за ново вработување. Затворена е и пријава за вработување во средно училиште, бидејќи одлуката била донесена во дозволениот период.
ДКСК не утврдила прекршување ниту кај кандидат за градоначалник кој ветувал парични средства во готово за ранливи категории и пензионери, оценувајќи дека станува збор за промоција на изборна програма.
„Се работи за изјава дадена пред медиуми за дел од програма на кандидат кој што е посветен на ранлива категорја на граѓани како и на пензионери. Се работи за проект кој што го промовира и мерка која подразбира дел од неговата програма и промоција на активностите кои што ќе бидат реализирани во текот на мандатот, посочија оттаму.“
На седницата, ДКСК ја усвои и Методологијата за изготвување на новата Национална стратегија за спречување на корупцијата 2026–2030.