Српските власти на барање на Основното јавно обвинителство Битола наредиле замрзнување имот на фирма во Белград поврзана со македонскиот бизнисмен Борче Марковски кој на почетокот на месецов беше осомничен и притворен поради злоупотреби поврзани со РЕК „Битола“, тешки 1,7 милиони евра.
Според Јавното обвинителство на Република Северна Македонија, имотот што ОЈО Битола побарало итно да биде замрзнат од надлежните органи во Србија, вклучува 10 нови товарни и приклучни возила набавени во 2025 година за фирма со седиште во Белград за која е утврдено дека „има сопственичка поврзаност со лице осомничено за злоупотреби во РЕК ‘Битола4, против кое беше поведена истрага на 9 октомври“.
Иако во соопштението на Обвинителството не е наведено за кое лице станува збор, сепак од контекстот, како и од наведениот датум, во него повеќе од јасно е дека станува збор за бизнисменот Борче Марковски, сопственик на фирмата „Марковски компани“, кој заедно со уште седум лица е осомничен во истрага на битолското обвинителство за кривични дела поврзани со јавна набавка за дислокација на погонски станици од ТЕЦ „Осломеј“ во РЕК „Битола“.
Битолското обвинителство побарало српските власти да забранат продажба и какво било располагање со товарните возила, бидејќи постои сомневање дека тие биле набавени од кривичните дела за кои е отворена истрага во земјава.
„Од српските органи беше побарано да забранат на правното лице од Белград, на неговиот управител или на друго лице во нивно име да ги отуѓува, оптоварува или да располага со моторните возила за кои постои сомнение дека се набавени и претставуваат посредна имотна корист од кривичните дела за кои е отворена истрага“, се вели во соопштението од Обвинителството.
Дополнително, од српските власти било побарано да се обезбеди и отвори сеф, што, според истражните органи во земјава, осомничениот македонски бизнисмен го поседувал во една српска банка, а со цел да се провери неговата содржина.
Поднесените барања се прифатени од српското обвинителство, кое издало наредби за замрзнување на наведениот имот.
Покрај надвор од земјава, на барање на Обвинителството се замрзнати и околу 30 милиони денари (488 000 евра) од сметките на Марковски и неговата фирма во земјава, која исто така е опфатена во истрагата.
Битолското Обвинителство побарало и забрана за располагање со дополнителен движен и недвижен имот на осомничениот бизнисмен и неговата фирма за кои постои сомневање дека се незаконски стекнати и кои во иднина можат да бидат конфискувани.
„Обвинителството побара да се забрани и располагање на дополнителен движен и недвижен имот во државава – три стана во Скопје, парцела градежно неизградено земјиште и гаража, стекнати во 2024 година, како и три товарни и едно патничко возило набавени во 2025 година, за кои постои сомнение дека претставуваат принос од казниво дело, односно имот кој во иднина може да е предмет на конфискација поради сторените кривични дела кои се опфатени со истрагата“, се наведува во соопштението на Јавното обвинителство.
Основното јавно обвинителство Битола на 9 октомври отвори истрага против бизнисменот Борче Марковски и уште седум други лица поради основани сомненија дека тие како група сториле кривични дела поврзани со јавна набавка за дислокација на погонски станици од ТЕЦ „Осломеј“ во РЕК „Битола“.
Меѓу другите осомничени, еден е вработен во „Марковски компани“, која исто така е опфатена во истрагата како правно лице, додека другите се поранешни раководители во Комбинатот. Меѓу нив е поранешниот директор во РЕК „Битола“, Пеце Матевски, кој веќе е обвинет во предметот „Адитив“, исто така за злоупотреби за кои веќе се води судски процес.
Тие се товарат дека опремата што „Марковски компани“ требало да ја дислоцира, според рударскиот проект за експлоатација на рудникот за кој била наменета, воопшто не била предвидена.
Независно од тоа, тендерот се спровел и го добил „Марковски компани“ ДООЕЛ за сума од околу 1,7 милиони евра, а целата постапка се одвивала кон крајот на 2023 и почетокот на 2024 г. За тие пари, фирмата требало да ја демонтира опремата во ТЕЦ „Осломеј“, да ја транспортира до новата локација близу РЕК „Битола“ и потоа да ја монтира за да се употребува за транспорт на рудата која се ископувала на локацијата. „Марковски компани“ ги направиле првите два чекора, демонтажата и транспортот, но наместо да се монтира, опремата била само оставена во кругот на РЕК „Битола“ без да се монтира и употребува.
Битолскиот суд на Марковски првично му одреди куќен притвор, но по жалба на Обвинителството, Кривичниот совет на Судот ја преиначи мерката и му одреди 30-дневен ефективен притвор, како што од почетокот бараше ОЈО Битола.