Со целовечерен концерт на ансамблот „Македонија“, вечерва ќе започне серијата настани по повод одбележувањето на 19 години од постоењето на Универзитетот „Гоце Делчев“ – Штип.
Концертот ќе започне во 19 часот во Мултимедијалниот центар на Економскиот факултет, а пред публиката ќе бидат изведени: „Седнал Марко“ – соборски ора и песни од етничките предели Средорек, Жеглигово и Славиште; „Вено Пиле“ – вокална изведба од етничкиот предел Жеглигово; „Излегол Селман“ – вокална изведба од етничкиот предел Жеглигово; „Каршијак“ – соборски ора и песни од етничкиот предел Скопска Блатија; „Јанино“ – оркестарска изведба; „Малешевска“ – оркестарска изведба; „Чангулово“ – соборско оро од етничкиот предел Малешево; и „Шетнала се Јана“ – соборски ора и песни од етничкиот предел Пијанец.
На 26 март, исто така во Мултимедијалниот центар, е закажана Ораторска вечер, а на 27 март ќе се одржи Свечена академија. „Патрониот празник на Универзитетот „Гоце Делчев“ – Штип претставува значаен чин за одбележување на вредностите врз кои се темели нашата академска заедница и момент за заедничко чествување на улогата на Универзитетот во унапредувањето на високото образование, науката и општествениот напредок. Вашето присуство на овој свечен настан ќе ни претставува особена чест“, се наведува во поканата од проф. д-р Дејан Мираковски, ректор на Универзитетот „Гоце Делчев“ – Штип.
На 30 март, во Свечената сала во Ректоратот, ќе се одржи промоција на доктори на науки.
Во најавата се нагласува дека станува збор за низа настани кои го обединуваат академскиот и културниот живот на Универзитетот, со учество на професори, студенти и гости од земјата и странство.