Во земјава од почетокот на јули се потврдени 10 нови жаришта на сипаници кај овци и кози, соопшти Агенцијата за храна и ветеринарство.
Болеста е регистрирана во одгледувалишта во Саса, Македонска Каменица, село Соколарци во општина Чешиново-Облешево, село Бигла во Делчево, селата Малино и Косевица во Свети Николе, како и во село Сопот во општина Куманово.
Според податоците на АХВ, во моментов има вкупно 17 потврдени жаришта, при што заболени се над 2.700 животни. Болеста е потврдена во 15 одгледувалишта на овци и две одгледувалишта на овци и кози. Првото жариште годинава беше регистрирано во јануари во село Лопате, општина Куманово.
Од АХВ информираат дека ќе продолжи депопулацијата на животните во новите жаришта, откако ќе бидат обезбедени согласности за локации за нивно закопување. Досега се извршени мерки за депопулација на повеќе од 1.400 животни, а последната интервенција била спроведена во село Сопот, Куманово.
Агенцијата одржала и средба со здруженија на одгледувачи на овци, на која била разгледана актуелната епидемиолошка состојба, проблемите со кои се соочуваат сточарите и мерките за спречување на ширењето на болеста.
Одгледувачите биле информирани и за потребните биосигурносни мерки, како и за начинот на навремено пријавување на сомнителни случаи до надлежните служби.