Градоначалникот на Општина Центар, Горан Герасимовски, ја посети детската градинка „13 Ноември“, каде во текот на летниот период се згрижуваат деца од училишна возраст, во рамки на програмата што ја реализира локалната самоуправа.
За време на посетата, Герасимовски разговараше со вработените и децата, при што се информираше за дневните активности и начинот на кој најмладите го поминуваат летниот распуст.
Во дворот на градинката тој присуствуваше и на дел од спортските, рекреативните и креативните активности организирани за учениците.
„И годинава излегуваме во пресрет на родителите кои поради работните обврски имаат потреба од згрижување на своите деца до 10-годишна возраст. Со оваа мерка им помагаме полесно да ги усогласат секојдневните обврски, а на децата им овозможуваме квалитетно исполнето лето. Ние сме единствена локална самоуправа во државата која ја спроведува оваа мерка“, се наведува во писмената изјава на Герасимовски.
Со летната програма за згрижување годинава се опфатени 120 деца од училишна возраст, распоредени во градинките „13 Ноември“, „Кочо Рацин“ и „Раде Јовчевски Корчагин“.