Здравствените власти во Холандија воведоа итни мерки на претпазливост откако 12 вработени во болницата „Радбауд“ во градот Најмеген беа ставени во карантин. Како што пренесуваат холандските медиуми, причината е можна изложеност на хантавирус при лекување на пациент кој претходно патувал на крузерот „Хондиус“.
Болницата соопшти дека дел од персоналот не ги следел целосно строгите безбедносни протоколи при контакт со крв и урина од заразениот пациент. Иако ризикот од пренос на инфекцијата е оценет како низок, одлучено е тие лица да останат во изолација во наредните шест недели.
Од здравствената установа не откриваат дали станува збор за лекари, медицински сестри или друг медицински персонал.
Инцидентот во болницата доаѓа по веста за епидемија на патнички брод под холандско знаме, каде беа опфатени 147 лица. Како последица на инфекцијата веќе се регистрирани три смртни случаи — брачна двојка од холандскиот регион Фрисланд и една државјанка на Германија.
До овој момент, потврдени се седум позитивни случаи на хантавирус, додека за уште неколку лица се чекаат резултати поради сомнеж за инфекција.