Само на 12 години, Македон Димитровски е примен во престижната програма за талентирани млади при Универзитетот „Џонс Хопкинс“ во САД.
Веста ја објави неговиот татко Владимир Димитровски на Фејсбук, при што упати благодарност до министерката за енергетика, рударство и минерални суровини Сања Божиновска за, како што наведува, човечноста, разбирањето и поддршката што му ја дала на Македон.
Тој посочува дека нејзиниот придонес за можноста неговиот син да се запише во „Johns Hopkins Center for Talented Youth“ (CTY) има големо значење за целото семејство.
Приемот во програмата претставува значајна можност за млади талентирани ученици да го надградуваат своето знаење и да се вклучат во образовни програми при престижниот американски универзитет.
„Grand Honors“ претставува највисоко признание за исклучително високи резултати во рамки на CTY тестирањето, додека SET (Study of Exceptional Talent) е програма и признание на „Johns Hopkins“ за ученици кои постигнуваат исклучително високи резултати, значително над очекуваното за нивната возраст.
На само 11 години, Македон постигнал и 1.440 поени на SAT тестот – 740 поени по математика и 700 поени по читање и пишување.
„Зад сите овие бројки и признанија стои едно нешто – огромна љубов кон знаењето“, пишува неговиот татко.
Тој додава дека Македон досега има освоено повеќе од 20 златни медали на меѓународни математички натпревари, а сега продолжува да учи, да сонува и да ги поместува сопствените граници.
Владимир Димитровски во објавата упатува и јавна благодарност до министерката за енергетика, рударство и минерални суровини Сања Божиновска за нејзината поддршка.
„Од срце сакаме јавно да ѝ се заблагодариме на министерката Сања Божиновска, а пред сè на човекот Сања, за нејзината човечност, разбирање и искрена поддршка за Македон. Нејзиниот придонес за остварувањето на можноста Македон да се запише на Johns Hopkins Center for Talented Youth (CTY) е нешто што за нас има огромно значење“, наведува Димитровски.
Тој посочува дека зад секој успех на едно дете стојат многу труд, знаење и посветеност, но понекогаш е потребна и поддршка од човек кој ќе го препознае талентот и ќе помогне во вистинскиот момент.
„Ви благодариме, министерке, но пред сè – Ви благодариме, Сања, што покажавте дека зад функцијата стои човек со срце“, пишува таткото на Македон.
Како што додава Димитровски, поддршката ќе остане дел од патот на Македон кон нови знаења, предизвици и успеси.