Зајкова: За конкретни резултати потребно е политичка волја и консензус
Претседателката на Либерално-демократската партија и пратеничка во македонското Собрание, Моника Зајкова, во интервју за Макфакс вели дека меѓу најголемите предизвици со кои се соочува државата се состојбите со образованието и правосудството.
„Тоа се едни области кои што, знаете како велат, ако сакате да уништите една нација, уништете ѝ го образованието. Ако сакате да има стагнација во една држава, треба да има уништен правосуден систем, бидејќи тој е темелот на сѐ она понатаму што се случува. И тука работите гледаме дека можеби се пробува да се направи исчекор, меѓутоа сѐ уште како да стоиме заглавени во место и тука граѓаните највеќе ни замеруваат. Тука треба повеќе да работиме. Со конкретни иницијативи да покажеме и јасни резултати до граѓаните, но сепак ова се и области кои што бараат политичка волја и консензус. Не може некој да се обидува да прави реформи, друг да ги блокира реформите. Ние сѐ уште живееме во едно општество во кое што имаме ниска државничка свест и на погрешни политики сакаме да собереме политички поени и тука е аномалијата. Ако сите се согласуваме и сите зборуваме гласно: да, образованието треба да го корегираме; да, ни требаат реформи во правосудството, ајде заедно да седнеме и да покажеме повисока државничка свест и да ги реформираме овие области“, вели Зајкова.
Зајкова додава дека проблемот се наоѓа во тоа што системот е така креиран. Доколку темелите на системот биле поставени поинаку, тој поинаку ќе се развивал, но дека има можност да се реформира.
ЛДП во наредниот период, после тематскиот конгрес, кој е планиран за месец март, ќе предложи конкретни иницијативи и чекори, кои навидум ќе изгледаат многу мали, но ќе бидат клучни за да може да почнат да се движат работите и конечно да почнат да се подобруваат нештата.
„Па, тука ќе опфатиме дел од сите правосудни органи, од Законот за јавнообвинителска служба, Законот за јавни обвинители, Судскиот совет, кој што никој не го допрел. Но и често напоменувам и тука ќе напоменам, секоја одговорност мора да има име и презиме. И ова што велите дека се случува во образованието. Ние како по дифолт само да напаѓаме дека министерството е криво. Јас ќе ви кажам дека кога го решававме проблемот со матурантите, забележавме дека во Бирото за развој на образованието програмите не се ажурирани од 2011-та, 2012-та година и тогаш укажавме, можеби во меѓувреме постапиле. И мора да престанеме со онаа генерална слика: „не чини судството, не чини обвинителството“. Не. И внатре во судството и во обвинителството и во секоја правосудна има луѓе кои што се квалитетни. Тие сигурно не сакале да бидат ставени под некој кој што ги затајува работите. Мора да ја детектираме одговорноста и таа одговорност да биде санкционирана“, истакнува Зајкова, додавајќи дека за сето ова треба политичка волја од сите актери.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа
