Стоилковски: Дали последното бегство од затвор е договорено со СДС?

Затворот во Македонија постои само за оние коишто немаат врска со власта, СДС, организираниот криминал и корупцијата, обвинува портпаролот на ВМРО-ДПМНЕ, Наум Стоилковски.

На денешната прес-конференција Стоилковски рече дека овозможувањето на ладнокрвен убиец да избега од затвор е уште потврда за оваа теза.

-Последното бегство на затвореник, ладнокрвен убиец, се случува со насилство, пукање, ранети полицајци, и веројатно неминовно во дослух со затворските служби. Командир на смената на затворската полиција, којшто и претходно има досие за поткупливост, е човек близок на СДС! И тоа е факт! Толку близок што на фотографија со генералниот секретар на СДС, Миле Зечевиќ, пред неколку недели порачува „со шефот до крај“. Ова е таа фотографија, рече Стоилковски.

Тој постави неколку прашања поврзани со бегството на Беким Мемети кое се случи во четвртокот вечерта.

-Со оглед на оваа фотографија и оваа порака, Миле Зечевиќ мора да ја објасни пораката, за каков крај пишува командирот на затворската смена? Дали и што било договарано пред да настане оваа фотографија и пред да биде напишана оваа порака? Дали спектакуларното бегство било дел од некаква планирана стратегија? Дали е ова цената за враќањето на докажано поткуплив службеник на работа и неговото поставување на позицијата во затворската полиција? И последно, но можеби најважно, зошто, кои се мотивите за вакво организирано бегство во веројатен дослух со член на СДС верен како што вели „со шефот до крај“? Дали бегството е договорено со СДС?, прашува Стоилковски.

Според него, само избори се излезе од оваа состојба во која нѐ внела владејачката СДСМ.

-Нема безбедносен скандал во Македонија, нема криминал, нема криминалец којшто нема конекција со СДС, системот за казни и ресоцијализација е продолжена рака на корумпираното МВР и Правда. Во затвор остануваат и отслужуваат казна само оние коишто не се во дослух со СДС и владејачката коалиција на криминалот и корупцијата! Само избори се излез од оваа состојба во која што не втурна СДС, рече портпаролот на најголемата опозициска партија.