Претседателот Пендаровски во работна посета на Агенцијата за разузнавање

Претседателот на Стево Пендаровски, денеска оствари работна посета на Агенцијата за разузнавање на Република Северна Македонија.

За време на посетата, претседателот Пендаровски беше информиран за тековните и предвидените активности во надлежност на Агенцијата, насочени за собирање, анализа и обработка на разузнавачки информации коишто се значајни за безбедноста, одбраната, политичките, економските и други интереси на Македонија.

Претседателот беше запознаен со придонесот на Агенцијата за разузнавање во исполнувањето на стратешките цели на Македонија – членството во НАТО и ЕУ, со акцент на меѓународната соработка на Агенцијата со партнерските служби. На средбата со раководството беше разговарано и за меѓуинституционалната соработка како важен дел за координацијата на активностите на институциите со сродна дејност со Агенцијата за разузнавање.

Претседателот Пендаровски беше информиран и за активностите на Агенцијата за внатрешни реформирање и донесување нов Закон, со цел градење модерна и ефикасна разузнавачка служба, согласно препораките, критериумите и поддршката на НАТО.