Пендаровски: МАНУ подразбира дека таму нема академици Албанци, затоа треба да се смени името

Кандидатот за претседател на државава, кој е поддржан од владеачките партии, Стево Пендаровски, вели дека МАНУ како и имињата на другите институции, како Македонска радио телевизија (МРТ) треба да се сменат затоа што не смееме да имаме етнички наслови на институциите.

Ова, тој го истакна во синоќешното гостување во дебатниот магазин “Клик Плус“ на Телевизија 21, запрашан за тоа кој е неговиот став за последната одлука на Владата за промена на имињата на институциите.

-Не смеевме да имаме етнички наслови на институциите. Македонска телевизија, јас го кажувам илјада пати тој пример. Македонска Армија беше првиот нацрт на законот за одбрана. Стоеше Македонска Армија. Целокупната група на ПДП, во тоа време 23 пратеници Албанци напуштија и рекоа ние нема да се вратиме назад во институциите. Во тоа време уште имавме армија од регрути, не професионалци, вели нема да имате ниту еден регрут Албанец бидејќи тие со овој назив, го толкуваат тоа дека е тоа армија само на Македонци. Или имате МАНУ, ќе видиме новиот назив како ќе биде, меѓутоа македонска академија подразбира дека таму нема академици Албанци.