Залихите на природен гас во европските подземни складишта паднаа на најниско ниво за овој период од годината од 2013 година, покажуваат пресметките базирани на податоците на Gas Infrastructure Europe.
Складиштата во Европа моментално се исполнети со 63,28 проценти, што е значително под вообичаеното ниво за крајот на август. Во истиот период лани исполнетоста изнесувала околу 76 проценти, а сегашното ниво е за 17,24 проценти пониско од петгодишниот просек за овој датум.
Во складиштата на земјите од Европската Унија во моментов има околу 69,2 милијарди кубни метри гас, што е за 14,3 милијарди кубни метри помалку отколку пред една година.
Проблем е и темпото со кое европските земји ги дополнуваат резервите пред зимата. Нето-вбризгувањето на гас во август е на најниско ниво во последните шест години.
Од почетокот на април во европските складишта се внесени околу 39 милијарди кубни метри гас, што претставува само 57 проценти од количината која, според проценките, е потребна за претстојната зимска сезона.
Европската комисија предвидува земјите-членки да ги наполнат складиштата до 90 проценти во периодот меѓу 1 октомври и 1 декември, иако во потешки пазарни услови е дозволено ограничено отстапување од оваа цел.
Според проценките наведени во извештајот, за исполнување на стандардот пред зимата 2026/27 ќе треба да бидат вбризгани најмалку уште 68 милијарди кубни метри природен гас.
Ниските резерви доаѓаат во момент кога Европа и натаму се обидува да ја намали зависноста од рускиот гас и сè повеќе се потпира на течен природен гас и алтернативни правци за снабдување. Тоа значи дека текот на полнењето во следните неколку месеци ќе биде еден од клучните фактори за стабилноста на цените и снабдувањето во текот на зимата.