Украина очекува до следниот месец во фондот за набавка на оружје од САД да има околу 3,5 милијарди долари, изјави денеска украинскиот претседател Володимир Зеленски.
Како што пишува AP, финансискиот аранжман познат како Листа на приоритетни барања на Украина (PURL) ги обединува придонесите на членките на НАТО, освен Соединетите Американски Држави, со цел да се купи американско оружје, муниција и опрема.
„Од нашите партнери добивме повеќе од 2 милијарди долари токму за PURL програмата. Дополнителни средства ќе добиеме во октомври. Мислам дека ќе имаме околу 3,5–3,6 милијарди долари.“, рече Зеленски на заедничката прес-конференција во Киев со претседателката на Европскиот парламент Роберта Метсола.
Зеленски не откри детали за тоа кое оружје ќе биде во првите пратки, но нагласи дека тие сигурно ќе содржат ракети за противвоздушните системи Patriot и за повеќецевните ракетни системи HIMARS.
Системите Patriot се клучни за одбрана од руските ракетни напади, додека HIMARS значително ја зголемија способноста на украинската армија за прецизни удари.