Украина постигна политички договори со САД за производство на ракети-пресретнувачи „Патриот“ на нејзина територија, изјави вечерва украинскиот претседател Володимир Зеленски, цитиран од британските медиуми.
Зеленски рече дека работата на техничките детали е во тек.
Дополнително, Украина во следните денови ќе ги добие критично важните ракети-пресретнувачи „PAC-3 – Патриот“ од САД, додаде тој.
Киев, истовремено, ќе му обезбеди на Вашингтон разни видови дронови, за да ги тестира, истакна украинскиот претседател, цитиран од „Укринформ“.
Зеленски редовно повикува на итни испораки на опрема за украинската воздушна одбрана (ADF) поради смртоносните руски воздушни напади.
И американскиот претседател Доналд Трамп вчера од Анкара изјави дека Вашингтон ќе му додели на Киев лиценца за производство на ракети за системите за воздушна одбрана „Патриот“.
Зеленски вечерва рече дека Киев и неговите сојузници, на состанокот следната недела во Франција, ќе разговараат за борбата против руските балистички ракети, кои предизвикуваат сериозни проблеми за украинската воздушна одбрана.
Според украинското Министерство за одбрана, средствата за воздушна одбрана собориле 89 отсто од беспилотните летала и ракетите што се користени во руските напади минатиот месец, објави Укринформ. Меѓутоа статистичките податоци покажуваат дека воздушната одбрана уништила 90 отсто од беспилотните летала и крстосувачките ракети, но само 40 отсто од балистичките ракети.