Украина е подготвена брзо и конструктивно да работи на успехот на американскиот мировен план, потврди претседателот Володимир Зеленски по денешниот телефонски разговор со генералниот секретар на НАТО, Марк Руте.
Двајцата соговорници ги разгледале „достапните дипломатски опции“ за ставање крај на војната со Русија, во контекст на планот од 28 точки што делегација на високи американски претставници му го презентираше на Зеленски во средата во Киев.
„Разговаравме за достапните дипломатски опции и планот презентиран од американската страна. Сега сме подготвени да работиме брзо и конструктивно за да го обезбедиме неговиот успех. Ги координираме нашите понатамошни заеднички активности“, напиша Зеленски на социјалната мрежа „Х“.
Овие консултации доаѓаат откако американскиот претседател Доналд Трамп изјави дека верува оти четврток е добар рок Украина да го прифати мировниот предлог поддржан од САД.
Зеленски претходно, по разговорот со американскиот потпретседател Џеј Ди Венс, истакна дека Киев го почитува ставот на Вашингтон.
„Украина отсекогаш ја почитувала и продолжува да ја почитува желбата на американскиот претседател Доналд Трамп да го прекине крвопролевањето и ние позитивно гледаме на секој реалистичен предлог“, рече украинскиот лидер.