Канцеларијата на украинскиот претседател Володимир Зеленски побара од Генералното обвинителство на Украина да разгледа можност за покренување кривична постапка против белорускиот претседател Александар Лукашенко, поради наводна вмешаност во војната во Украина.
Според објавеното писмо од високиот функционер Олех Татаров, оваа иницијатива доаѓа по барањето на Белорускиот демократски форум – опозициска организација во егзил. Опозицијата бара Украина да го гони Лукашенко за воени злосторства, геноцид и „државен терор“.
Форумот го обвинува белорускиот лидер за соучество во руската агресија и за присилно преместување на најмалку 2.442 украински деца во Белорусија, практика документирана од Универзитетот Јеил. Додека белоруската администрација не даде официјален коментар, Лукашенко во 2023 година тврдеше дека децата биле примени привремено заради рехабилитација.
Евентуалното обвинение, иако со мала веројатност за брз судски расплет, би можело да послужи за дополнителен западен притисок Врз Минск. Ова се случува во период кога Лукашенко преговара со администрацијата на американскиот претседател Доналд Трамп за можно ублажување на санкциите во замена за ослободување политички затвореници.
Во меѓувреме, Киев го заострува ставот кон Минск, барајќи отстранување на радио-релејни станици за кои тврди дека им помагаат на руските дронови.
Од друга страна, Лукашенко овој месец повтори дека нема да испрати белоруски војници на фронтот, порачувајќи им на офицерите:
„Никој нема да ве испрати во ова крвопролевање“.
Сепак, Белорусија продолжува да нуди логистичка поддршка за Москва, вклучувајќи го и распоредувањето на руско тактичко нуклеарно оружје на своја територија. Генералниот секретар на Белорускиот демократски форум, Дмитриј Болкунец, оцени дека евентуалниот процес против Лукашенко би имал силно влијание врз него и би претставувал чин на историска правда.