Водата од гостиварскиот водовод не смее да се користи ниту за пиење ниту за подготовка на храна сè додека не бидат готови лабораториските анализи и не се потврди нејзината безбедност, изјави директорот на Агенцијата за храна и ветеринарство (АХВ), Оливер Миланов.
Одговарајќи на новинарски прашања по прес-конференцијата за состојбата со водоснабдувањето во Гостивар, Миланов информира дека инспекциските служби на АХВ веќе вршат засилени контроли кај рестораните, угостителските објекти, градинките, болниците и другите институции.
„Рестораните и сите оператори со храна мора да обезбедат безбедна вода. Сè што доаѓа во контакт со храната, приборот и процесот на подготовка мора да биде соодветно обезбедено. Доколку се утврдат неправилности, ќе следуваат санкции“, рече Миланов.
Тој нагласи дека забраната важи и за техничка употреба на водата, сè до добивањето на официјалните лабораториски резултати.
Во однос на информациите од Обвинителството дека во водата биле пронајдени 2.419 колиформни бактерии на 100 милилитри, Миланов не сакаше да ги коментира бројките додека не завршат анализите.
„Тоа е предмет на истрага на МВР, криминалистичката полиција и Основното јавно обвинителство. Она што секој разумен човек го знае е дека вакво нешто не смеело да се случи“, изјави директорот.
За причините за загадувањето и наводите дека спорниот приклучок бил поставен за зголемување на притисокот во системот, Миланов рече дека тоа ќе го утврдат надлежните истражни органи.
Во меѓувреме, институциите обезбедуваат дополнителни количини вода за жителите на Гостивар. Според Миланов, Владата обезбедила околу 50 тони вода, а производителите на флаширана вода веќе вршат дистрибуција.
Тој очекува во најкус можен рок системот да биде исчистен и граѓаните повторно да добијат безбедна вода за пиење.