Царинската управа на Македонија изведе серија успешни акции во кои се запленети огромни суми на пари, нелегални лекови и дрога, а во тек се опсежни истраги за шверц кои досега биле незамисливи за работење, откри директорот на Царинската управа, Бобан Николовски, во своето гостување на „Топ тема“ на Телма телевизија.
Николовски соопшти шокантни бројки за сработеното на терен и заплените кои ги реализирале неговите служби:
„Запленивме половина милион евра кеш, 25 илјади парчиња лекови и медицински инструменти, во тек е истрага за заплена на 80 килограми марихуана по информација на царинското разузнавање, а веќе неколку месеци во тек е и опсежна истрага за акцизна стока која досега било незамисливо некој воопшто да работи на ова. Годинава Одделението за истраги поднесе дури 71 кривична пријава.“
Првиот човек на Царината потенцираше дека стекнатата доверба на меѓународно ниво е клучниот фактор кој овозможува добивање и размена на оперативни информации во реално, односно „нулта време“.
Според него, клучот за целосно уништување на шверцот лежи во институционалното поврзување: „Една институција може многу да направи, но ако сите институции се добро поврзани криминалот нема каде да бега. Со многу повеќе елан и желба ја чуваме Македонија и се бориме против криминалот“.