Министерот за култура и туризам, Зоран Љутков, преку емотивно обраќање изрази длабоко сочувство за трагичната смрт на баритонот Ристе Велков, нагласувајќи дека денешниот ден е исклучително тажен за националната култура.
Тој ја потенцираше уметничката трага што првенецот на Македонската опера и балет ја остави зад себе преку својата долгогодишна посветена работа на сцената.
Според министерот, загубата за македонската уметничка сцена со прераното заминување на Велков е незаменлива.
„Денес е тажен ден за македонската култура. Замолкна еден моќен и препознатлив глас, но одекот на уметноста на Ристе Велков ќе продолжи да живее на сцената, во музиката и во срцата на публиката. Со неговото заминување, македонската опера изгуби првенец, а културата- уметник кој со достоинство, страст и врвна посветеност ја претставуваше нашата земја дома и во светот“, напиша Љутков.
Во моментите на сериозна болка и неверување кои ја потресоа јавноста, тој упати зборови на поддршка до најблиските на загинатиот уметник.
Љутков заклучи дека богатото творештво и вокалните изведби на баритонот нема да бидат заборавени од идните генерации.
„Во овие мигови на болка и неверување, изразувам искрено сочувство до неговото семејство, колегите, пријателите и до сите што имаа чест да го познаваат и да уживаат во неговата уметност. Неговото име и неговиот глас ќе останат трајно впишани во македонската културна меморија. Слава му“, стои во неговата официјална објава.