Парите биле на родителите, спечалени макотрпно од земјоделие, пред сè од лозје. Со ваква одбрана, адвокатите на апелацискиот судија Ѓоко Ристов се обиделе да го оправдаат пронаоѓањето на 350.000 евра, заѕидани зад кујнските плочки во родителската куќа во Неготино.
Сепак, приказната за лозјето не беше доволно уверлива ниту за Обвинителството, ниту за Судот, поради што на судијата му е одредена мерка куќен притвор. Иако во оваа фаза обвинителството не може директно да ги поврзе запленетите банкноти со конкретен предмет што го судел Ристов, обвинителката Искра Хаџивасилева на брифинг со новинарите откри детали за тоа како течела деветмесечната истрага.
Парите паѓале од ѕидот при вториот претрес
Сумата од 350.000 евра, спакувана главно во банкноти од 500 и 200 евра, не била пронајдена веднаш. Биле потребни два обиди. При првичните претреси на три локации, истражителите налетале само на празен бетонски бункер. Вториот пат, истрагата била попрецизна. Иако родителите негирале дека скоро реновирале, полицијата забележала сомнителни детали во кујната.
„Забележани се различни плочки кои биле искршени. При мало кршење се појави дупка, дупката се прошири на десно, почнаа да паѓаат пари“, сликовито објасни обвинителната Хаџивасилева.
Таа појасни дека во овој случај, квалификацијата „перење пари“ не се однесува на класично пуштање во промет на нелегални средства, туку на делот од Кривичниот законик кој опфаќа „криење пари“, одредба која во праксата поретко се применува. Потврдено е и дека Ристов поседувал непријавен имот.
„Мозаикот“ се склопил преку Ѓаволот и Синџирот
Истрагата траела речиси една година, а првичните индиции дошле преку службени белешки од Агенцијата за национална безбедност (АНБ), но и од сведоци кои пријавувале дека судијата им барал мито. Сепак, клучниот момент за формирање на предметот е поврзан со случајот „Синџир“ и апсењето на поранешниот државен правобранител Фехми Стафа.
Сомнежот кај обвинителите се разбудил кога Љупчо Пецов – Ѓаволот, осомничен во „Синџир“, добил поблаги мерки.
„Доаѓаат сведоци, кажуваат им се влијаело, па од предметите што се работат овде гледате дека навистина нешто се случува, па имате телефон што ќе ви се појави од некоја истрага, пример од некој затвореник, ќе го дадете во нашата лабораторија, ќе најдете интересни разговори меѓу затворениците… Не е само една дојава, туку се градеше мозаик околу 9 месеци“, рече Хаџивасилева.
Таа додаде дека случајот со Пецов бил пресуден за да се исцртаат контурите на истрагата:
„Контурите се исцртаа со истрагата против Љупчо Пецов-Ѓаволот, од предметот Синџир. Не било возможно да не влезе ни ден во притвор, туку одма да добие куќен притвор.“
Интересен детал од брифингот е што ниту судијата Ристов, ниту правобранителот Стафа не биле следени со Посебни истражни мерки (ПИМ), односно истражните органи не ги прислушувале, туку случајот го граделе врз база на материјални докази и сведочења.