Времето денеска ќе биде сончево и топло со слаб до умерен ветер од југоисточен правец, додека максималните температури ќе се искачат до 36 степени.
Според прогнозата на УХМР, минималната температура ќе биде во интервал од 8 до 19, а максималната ќе достигне од 30 до 36 степени. Во Скопје се очекува слично време со слаб до умерен ветер од јужен правец, каде што утринската температура ќе се спушти до 13, а дневната ќе достигне до 36 степени.
Стабилното време ќе се задржи и во текот на утрешниот ден и задутре претпладне, кога ќе биде сончево и топло со мала до умерена локална облачност. Сепак, од утре попладне се очекува промена на временските прилики.
Метеоролозите за попладневните часови најавуваат локален пороен дожд, грмежи и засилен ветер, а атмосферата ќе биде подложна на подраматични процеси.
– Заради големата енергија во атмосферата локално процесите ќе бидат во форма на невреме со интензивен пороен дожд, силен ветер и појава на град, предупредува Управата за хидрометеоролошки работи.
Од УХМР дополнуваат дека ваквиот тренд ќе продолжи и до крајот на оваа седмица, кога наместа ќе има услови за локална нестабилност, исто така проследена со пороен дожд, грмежи и засилен ветер.