Денешниот ден носи променливо облачно време со врнежи од дожд, кои ќе бидат пообилни во западните и југоисточните делови од државата. Временските услови ќе бидат проследени со умерен, а повремено и засилен ветер од северен правец. Според Управата за хидрометеоролошки работи (УХМР), минималните температури денеска ќе се движат во интервал од 3 до 8 степени, додека дневниот максимум ќе достигне меѓу 10 и 15 степени.
Во Скопје времето ќе биде променливо облачно со дожд и слаб до умерен северен ветер. Температурите во главниот град ќе се движат во интервал од 7 до 15 степени.
Периодот до крајот на неделата ќе биде под влијание на влажна и нестабилна воздушна маса, што ќе услови променливо облачно време со повремени врнежи од дожд. Утре се очекуваат услови за ретки грмежи, а процесите наместа ќе бидат поинтензивни. Синоптичарите предупредуваат на локално невреме со пообилен пороен дожд, грмежи и засилен ветер, особено во западните и јужните делови, каде се очекува да наврнат над 30 l/m².
Дневната температура ќе биде во постепен опаѓање. Кон крајот на работната недела, поточно во четврток и петок, утринските температури на места ќе се спуштат и под нулата. Во четврток се очекува северен ветер, кој повремено ќе биде силен.