Коалицијата ВРЕДИ ја обвини Демократската унија за интеграција (ДУИ) дека, во пресрет на секои локални избори, наместо да зборува за општинските проблеми, користи националистичка реторика и референдуми за да го сокрие, како што велат, својот долгогодишен неуспех во управувањето со општините.
„ДУИ има едноставен рецепт веќе две децении – кога доаѓаат избори, наместо отчет за работа, измислува национални теми, знамиња и референдуми. Причината е очигледна – сака да ја избегне реалната слика за состојбата во општините со кои управува“, се наведува во соопштението на ВРЕДИ, што го пренесува МИА.
Од коалицијата обвинуваат дека општините под водство на ДУИ и по 20 години власт немаат основна инфраструктура, вода за пиење, канализација, современи училишта или социјални сервиси за децата и старите лица. Според нив, додека граѓаните живеат во сиромаштија, функционерите на ДУИ се збогатиле.
„ДУИ знае – ако изборите се водат за општините, трката ја губат. Затоа секогаш бегаат од вистината и се кријат зад лажни национални прашања“, велат од ВРЕДИ.
Во истото соопштение се потенцира дека коалицијата ВЛЕН, која е дел од актуелната власт, за само една и пол година обезбедила 80 милиони евра инвестиции за албанските општини, во проекти што вклучуваат нови патишта, училишта и водоводи.
„Разликата е јасна – ДУИ за 20 години остави само неуспех и празнина, ВЛЕН за кратко време донесе реални резултати. На 19 октомври, граѓаните ќе ставaт крај на националистичката измама. Нема знаме што ја покрива корупцијата, нема референдум што ги крие неуспесите“, порачуваат од ВРЕДИ.
Со заклучокот дека „ВЛЕН е клучот за повторно издигнување на албанските општини“, коалицијата повика на мобилизација за претстојните избори и враќање на општините во рацете на граѓаните.