Сообраќајот на државните патишта низ Македонија се одвива во зимски услови и по влажни коловози. Според последните информации, густа магла значително ја отежнува видливоста на неколку клучни патни правци.
Најкритично е на патниот правец Гевгелија – ГП „Богородица“, каде видливоста е намалена до 60 метри. На планинскиот премин Стража и во регионот на Маврово, маглата ја ограничува видливоста до 100 метри. Од АМСМ информираат дека интензитетот на сообраќај надвор од градските средини е со умерен интензитет, а на граничните премини нема подолги задржувања.
Упатена е препорака до возачите за прилагодена брзина на движење и внимателно управување со возилата низ котлините и клисурите поради можна појава на одрони. Ова особено се однесува на делниците Катланово – Велес, Маврово – Дебар – Струга, Виница – Берово и Кочани – Делчево.