Физички напад врз полициски службеник и пронајдено нелегално оружје е епилогот од инцидентот што рано утрово се случи во Градскиот парк во Скопје. Полицијата лишила од слобода 37-годишен маж, по потекло од Нигерија, кој поседувал американски документи.
Ситуацијата ескалирала во 04:30 часот пред угостителски објект, кога лицето физички насрнало врз полицаецот кој извршувал службени дејствија.
При претресот, кај него било пронајдено вистинско мало арсенал – пиштол „Глок“ со две рамки и 30 куршуми, за кои немал дозвола.
„На 21.12.2025 во 04:30 часот пред угостителски објект во Градскиот парк во Скопје полициски службеници од СВР Скопје го лишиле од слобода У.И.У.(37) од Нигерија, (со американски пасош и лична карта) поради тоа што физички нападнал полициски службеник кој извршувал службени дејствија. При извршен преглед кај него биле пронајдени и одземени пиштол „глок“, две рамки и 30 куршуми за кои не поседувал дозвола. По целосно документирање на случајот ќе следува соодветен поднесок“, велат од МВР.