Советот на Општина Кавадарци на денешната вонредна седница едногласно усвои серија заклучоци и иницијативи за помош на земјоделците кои претрпеа сериозни штети од пролетниот мраз. Советниците побараа од надлежното Министерство и Владата да се обезбедат зголемени субвенции за лозарите кај кои ќе биде утврдена штета.
Меѓу барањата се и ослободување од воден надоместок за наводнување, како и ослободување од закупнина за земјоделско земјиште за погодените површини. Советот инсистира и на зголемување на процентот на државното обесштетување.
„Општина Кавадарци да објави јавен повик со цел граѓаните на Општина Кавадарци кои што имаат претрпено материјална штета на земјоделските насади од природна непогода ниски температури, мраз, што го зафатија подрачјето на територијата на општината, во месец мај 2026 година, да пријават“, се наведува во заклучоците.
Комисија формирана од Советот веднаш по јавниот повик ќе излезе на терен за директен увид кај физичките и правните лица. Извештајот за штетите, изработен како елаборат, ќе биде доставен до Владата.
На седницата, свикана по иницијатива на Левица, советникот Бошко Бошев укажа на тешката состојба на одредени микролокации.
„Имаме ситуации каде што во некои региони, на некои места, микро локации или депресивни места, имаме измрзнување до сто проценти. Тоа е во Шивец, покрај Црна Река, Дреново“, рече Бошев.