Тешка трагедија ја потресе Турција откако седумкатна станбена зграда се урна во градот Гебзе, во населбата Мевлана, при што животите ги загуби речиси цело едно семејство.
Од петчленото семејство Билир, спасувачите успеале да ја извлечат жива само 18-годишната Дилара Билир, по осум часа непрекината спасувачка акција. Таа била свесна и во стабилна состојба, по што веднаш е пренесена во болница.
Денеска, спасувачките екипи ги пронајдоа и телата на нејзините родители, Левент и Емине Билир, со што операцијата за пребарување и спасување беше завршена.
Трагедијата се случила вчера околу 7 часот наутро, кога зградата на улицата Исикгол се урнала од засега непознати причини.
Од раните утрински часови на терен биле распоредени стотици спасувачи, кои со тешка механизација ги отстранувале бетонските блокови и остатоците од зградата. Како мерка на претпазливост, беа евакуирани 12 околни згради, а улицата беше целосно затворена за сообраќај и обезбедена со челични бариери.
Првично беа пронајдени телата на 12-годишниот Мухамет Емир и 14-годишната Хајруниса, децата на семејството Билир. Со пронаоѓањето на телата на родителите, трагедијата доби најтежок исход – Дилара остана единствената преживеана членка на семејството.